اوسطوره لر
محرم پريزاد "سورگون"
يئنه كؤنلوم قوشو قاناد آچيبدير
خيال سماسيندا اوجادا گزير
قونور گؤز يوممادا آنايوردوما
بسميل قوشو كيمى اوره ييم اسير
پالچيق داخمالاردا٬ دار كوچه لرده
بويلانير٬ باش چكير يئنه بير بير
اوزون گئجه لرى كورسو باشيندا
ناغيللا ياتيردير قولاق يئر به يئر
تندير ايستىسينده شيرين نغمه لر
ايستى چؤره ك كيمى دالبادال پيشير
"قاراپاپاق" يئنير قاشين اوستونه
عاشيق زخمه ايله سازينى دئشير
ميللى قهرمانلار ناغيل دونوندا
خودكارا٬ پاشايا موددعى اولور
ظاليما٬ قولدورا اود قيسديرماغا
"كوراوغلو" يئنىدن ياراغا دولور
حسنخان مجليسى بير بيره دَيير
كوراوغلو نعره لى جنگه گئده نده
بير اوزوك قاشى تك قالا آلينير
"دليلر" "رؤوشن"ى يارديم ائده نده
آنام "نيگار" شئر تك چنلى بئللرده
آليجى قوش كيمى بره نى آلير
باج آلير بَىلردن٬ بزيرگانلاردان
ائللر دوشمانينى قورخويا سالير
ايگيت "بابك" باشى اوجا دايانير
ديزه چؤكدوره نمير مؤعتصم جللاد
اونا تله قورور دوستلوق دونوندا
ساتقين افشين٬ خايين سهل ايبن سنباد
بغداد فاتيحلرى شيشگين(١)واختيندا
هر ايشدن باش توتور بابك اؤلومون
نه زنجير٬ نه اؤلوم٬ قوچاق بابكين
سينديرابيلمه يير سينماز دؤزومون
قانيلا قيزاردير اؤز سيماسينى
دوشمان دئمه سين كى بابك سارالير
بو قودرت٬ بو دؤزوم٬ بو مردانه ليك
بيزه تاريخ بويو ياديگار قالير
نبى" آرخالانير ائله٬ "هجر"ه"
آينالى سسله نير داغدا٬ دره ده
قانلى قيصاصلانير٬ ائل دوشمانلارى
نبى اونودولمور هئچ بير كره ده
هجر آت بئلينده آذربايجانى
گزيبن قورويور اؤز زامانيندا
نه دئييم هر عصرين فرضييه لرى
ووروشور جهل ايله اؤز تاوانيندا
اليف بئى اؤيره دير خيردا قيزلارا
هامى سيلاحلانسين عئلمه٬ هونره
ظولمات قارشيسيندا دايانان آنا
ايشيق سپه له سين كنده٬ شهره
اوشاقلار چوخ سئوير "جيرتدان" ناغيلين
دئوى تعقيب ائدير او قورخماز اوشاق
بيزيم اؤلكه ميزده گله جكده ده
جيرتدانلار دئولرين جانين آلاجاق
"نسيمى" "سورگون" ده سويولورسا دا
اناالحق كلمه سين اوجادان سسلير
جهانه سيغمايان او بؤيوك اينسان
اينسان حؤرمتينى جانيندا بسلير
-------
(١)- شيشگين: قاراپاپاقلار ايچره٬ مغرور و تكببورلو آداما دئييلير
0 Comments:
Post a Comment
<< Home