شانلي بابك قالاسي

محرم وليپور

سينه گريب گردن چكن
ظاليملرين بئلين بوكن
بولودلارين باغرين سؤكن
شانلي "بابك" قالاسىيام
باشي اوجا قالاسىيام

يئلين كؤكسون سؤكه سؤكه
گؤيلره باش چكه چكه
آديمدا يوخ ذرره لكه
قوشدان قاناد سالاسىيام
شانلي "بابك" قالاسىيام

يئر اوزوندن ظولمو سيلن
مؤعتصملر قلبين دلن
تاريخيني اولو بيلن
اوجا داغلار لالاسىيام
شانلي "بابك" قالاسىيام

من سيغمارام هر بوداغا
بير چيراغام گلن چاغا
ايفتيخارام قاراداغا
يئنه باجلار آلاسىيام
شانلي "بابك" قالاسىيام

دونيا ائشيتسين سسىمي
آزالدمارام هوسيمي
يارالانميش ايلان كيمي
خايين گؤزو چالاسىيام
شانلي "بابك" قالاسىيام

"خوشنام" سوسما بئله گاهدان
الين اوزمه تك آللاهدان
عدالتسيز اولان شاهدان
يئنه تاجلار آلاسىيام
شانلي "بابك" قالاسىيام