baybek

Friday, June 25, 2004

بابكين دوغوم گونو



بــابــك
حسن احساني « اوفوق »- تبريز


سارسيلماز اودلاري يانديريب بابك
ائولادي اوستونو قــالاسين گره ك
بابكي كؤكوندن قوپاران دئيه ن
دؤنوب توپوردويون يالاسين گره ك


اصلان تك آنالار٬ قافلان آتالار
بير اوغـول قانينا مين بير قان آلار
كپه نك تك چيلقين اودا يانانلار
گوده لر اودلارين ائولادين گره ك

بابكي اوركده قانلا ياشاداق
جوانشير، جاويدان، ايييتلر ساياق
توركلرين ديلينده قوتسال بير اوجاق
تؤره ده ك بابكين قالاسين گره ك


اوفوق ده آيريلان شيرين جان ايله
تانيش اولار آيدين٬ ايشيق دان ايله
آزادليق ايسته ين قيزيل قـان ايله
سووارسين داغلارين لالاسين گره ك


بابكين دوغوم گونو

هوندور هوندور داغلار آشيب
بو آستانه گلميشيك
آزادليغي اؤلكه لره
وئره ك نيشانه گلميشيك


شانلي بابك قالخ آياغا
ائللر گليب قارا داغا
دوغوم گونون قوتلاماغا
بيز بو مقامه گلميشيك

آخان قانين چيچكله نيب
كورور كورور بالان گليب
جهالتين لشين سريب
بوتون فغانه گلميشيك


عطرين آلدي٬ سوسدو ديله ك
هئي دؤيونوب چيلقين اوره ك
عئشقينه بير پروانا تك
تام يانا يانا گلميشيك

اونودماريق سون نغمه سين
جوشدوروبدور ائل هوسين
زيارته داش قلعه سين
شانه به شانه گلميشيك


دوغسون «اوفوق» بوغونتودان
قاردان٬ بوزدان٬ ياغينتيدان
قارانليقدان٬ سيخينتيدان
بيز داها جانه گلميشيك


ايدئولوم منيم

قارشيدا عيززت وار٬ آرخا دا غئيرت
بزه نيب شرفله ساغ سولوم منيم
وورغونام تورپاغين آنا بيله نه
ذاتن بو ساياقدير اوصولوم منيم


قانيم رنگين آليب قيزيل لاله دن
عئشقيم ايلهام آليب گور شلاله دن
داملا داملا دامان هر پياله دن
محببتله دولوب فورمولوم منيم

ائحساسيم اولودور همي ده اينجه
كؤنولدن باغلىيام سارسيلماز گوجه
قارشيمي كسسه ده قارانليق گئجه
گونش تك ايشيقدير سون يولوم منيم


ياشيل «اوفوق»لارا يولداشام آرخا
چيچه يي بولبولسوز قويمام داريخا
شجره م اولودور٬ چيخيرسام چرخه
بابكدير٬ بابكدير ايدئولوم منيم


=-=
ويجدان «افوق»ونده سؤكولنده دان
گونش تك پارلايير حقيقت بير آن
بيزلر ده انسانيق؟ بابك ده اينسان !
بونو دوشوننده اوتانير بشر


حسن احساني « اوفوق »- تبريز

1 Comments:

Post a Comment

<< Home