اولو بابكه بير رياسيز سلام
بئزديم بو دجل موددعيلردن، جانا گلديم
بابك قاپيسين گؤردوم آچيق، ديوانا گلديم
بيدادي گؤروب، مرحوم آتام ساكيت اوتوردو
ستتار سيلاحين آلديم اله، مئيدانا گلديم
آمما بو سيلاح كوتله شيب ايندي، دوشوب ايشدن
ايندي بو حكيم محضرينه درمانا گلديم
فقرايله جهالت خوراسي كؤنلومو داغلير
بابك آديني تا ائشيديب، طوغيانا گلديم
ويرانه ده گيزلين قالار هميشه دفينه
خازين كيمي گزديم، بو اوجا ويرانا گلديم
دان اولدوزودور تاريخيميزده اولو بابك
بو اولدوزو گؤز گؤرمك اوچون كئيهانا گلديم
بابك! اوره ييم غوصصه و غمدير، سينه وولكان
وولكاني گؤتوردوم، يولا دوشدوم٬ قانا گلديم
افشين سني ساتدي، اؤزو ده نيفرته دوشدو
سن يوللاري آچدين بو قيزيل ائيوانا گلديم
اؤز كوركونو درويشلره انعام وئرردين
مهجور "وجي"يم، درگاهينا ائحسانا گلديم
0 Comments:
Post a Comment
<< Home