اؤلدوردون اؤلومو٬ اؤلن زاماندا

محرم پريزاد "سورگون"

دؤرد نالا چاپديردين قارا قاشقانى
مرامين ائل آرا سپديردين بابك!
مسلك دوشمانين٬ ائل دوشمانين
فيكرينى قارنينا تپديردين بابك!

ييرمى اوچ ايل ازدين دوشمان بورنونو
دولانا بيلمه دى آذربايجانا
عدالت مشعلين قويمادين سؤنه
اوجاقلار قورولدو٬ شاد٬ يانا يانا

آرخانى دايادين يئنيلمز داغا
اوجايدين ازلدن سن٬ باشى اوجا
گوندوز قيرغى كيمى شيغادين دوزه
گئجه اولدوزلارى سن سايا سايا

يئندير قيلينجىنى قودوز دوشمانا
دولاقلى٬ قولچاقلى قولونا قوربان
اودلو پئيكانينى گؤيلرده چاخدير
مسلكلى٬ مراملى يولونا قوربان

حياتين شيريندير٬ هر بير چاغيندا
اؤلدوردون اؤلومو٬ اؤلن زاماندا
نئچه كى دونيا وار مردانه ليك وار
ديرى قالاجاقسان ديرى٬ جاهاندا

دولدوردون دون گونشين آل شرابينى
قارانليق چاغلارى ظفر جامينا
"سورگون"م٬ فخريم وار سونسوز شانينا
داييم گووه نيره م بابك نامينا
--------
محرم پريزاد "سورگون" - ناشر: انتشارات زينب تبريز. ويراستار: محمد على نهاوندى(مغان). ايلك چاپ ايلى: ١٣٨٠ ٬ تيراژ: ٢٠٠٠ جلد٬ قطع: رقعى٬ تعداد صفحه: ١٥٩ صفحه٬ قيمت: ٨٠٠ تومان. شابك: ٩-١٢-٧٠٦١-٩٦٤