بابک بو گون بير آد دئييل!
بابک بوگون بير آد دئييل
يوز ايللري آشيب گلن
عصيرلره يئنيلمه ين
قهرمانليق دستانيدير
دده قورقود ائللرينين
ايگيد اوغلان٬ قوچ قيزلارين
اوزانلرين، قوپوزلارين
کيملييينين کئشييينده
ييلمازلارين
وارليغينين عونوانيدير.
بابک آدلي دايانيشما
گله جه يه آرخا دوران
قورتولوشا کؤرپو اولان
کؤنوللرده ساراي سالان
چنلي بئلده دؤولت قوران
ميللتيمين فرمانيدير.
داغ داغ دردي داغا دؤنن
دؤنه دؤنه درده دؤزن
گؤزگو کيمي بوز گؤل ايلن
دينج گؤرونن
ساوالانين وولکانيدير.
ائلي دوستاق
ديلي ياساق
آنلي آچيق، ايگيد قوچاق
تورک ائليمين سهنديدير٬ سولطانيدير.
بذ قالاسي
داش قايالاردان اولوشان
بولودلارا سينه گره ن
زيروه ده بير قالا دئييل
کئچميشيمين، وارليغيمين
اؤلمز، سؤنمز چراغيدير
قودوز٬ قودورقان يادلارا
قارشي گلن قودرتيمين اوجاغيدير.
ظولمه٬ زورا٬ خيانته
گئريلييه٬ جهالته
باش ايمه ين
سئوگيميزين اوردوسودور
گووه نيدير٬ داياغيدير.
بابک بوگون بير آد دئييل
آرزولارلا٬ ييرقالانان
اوره کلرده دالغالانان
آذربايجان ميللتينين بايراغيدير.
اسماعيل جميلي
0 Comments:
Post a Comment
<< Home