اؤلمز بابك
آذربايجان فولكلوروندان نومونه لر- ايكينجى جيلد (نمونه هاى فولكلور آذربايجان -جلد دوم) كيتابيندان آلينميشدير. توپلايان: دكتر س. جاويد٬ انتشارات فرزانه. تهران. چاپخانه افست مروزى. چاپ دوم. ٣٠٠٠ نسخه. شهريور ١٣٥٨.
اؤلمز بابك
اوشاقلاريم بوگون سيزه بابكدن دانيشاجاغام:
آذربايجان قديم مملكتلردن بيرىدير. بؤيوك تاريخه ماليكدير. پارلاق گئچه جه يى (گئچميشى م.ب.) اولموش٬ موختليف دؤوره لر گئچيرميش. او دؤوره لردن بيرى ده بابك خوررمدين دؤوره سىدير. بو دؤوره ١١٥٤ ايل بوندان اوول اولموش و ٢١ ايل داوام ائتميشدير. او تاريخده عربلر ايرانين بؤيوك قيسمتىنى آلديغى كيمى آذربايجانا دا سوخولموشدولار.
آذربايجان آراس چايىنين اطرافيندا موغان٬ قاراباغ و پله كان يئرلرينده ياشايان آذرىلر (توركلر م.ب.) خوررمىلر٬ عربلره قارشى عوصيان ائتديلر. بو ائلين باشيندا بابك قهرمان دوروردو و عوصيانچىلارا رهبرليك ائديردى. بابك خالقا خيدمت ائتدييى اوچون و اونلار ايله مئهريبان اولدوغونا گؤره خالق اونو صميمييت ايله سئوه ردى و دئديكلرينى يئرينه يئتيره ردى.
عرب خليفه لرينين گؤنده ردييى قوشونلار بير بيرينين آردينجا مغلوب اولوردولار. سون دفعه عرب خليفه سى ايران اعيانزاده لريندن "افشين"ى چاغيريب اونا بؤيوك مقام و پول وعده ائتدى. افشين پولا و مقاما آلدانيب اؤز وطنداشينى آرادان آپارماغا حاضير اولدو. داعوا چوخ چكدى. سونرالار دا بابكين قوشونو و اؤزو اوزون بير موحاصيره يه دوشدو. بابك مجبورييت قارشيسيندا داعوا حيله سى ايشله تمه يه مجبور اولدو. او حيله ايله اؤزونو و موحاصيره ده قالان يولداشلارينى قورتاردى.
قونشولوقدا اولان ائرمنى كندينه "سومبات" آدلانان بير ائرمنى بگين يانينا گئتدى. سومبات اونا ظاهيرده مئهريبانچيليق ائديب قوناق ساخلادى و گيزلين حالدا افشينه خبر گؤنده ردى. بابكين بو خيانتدن خبرى اولمادان موحاصيره اولوندو و توتولدو. خليفه دستور وئردى بابكين ساغ الينى كسديلر. بابك سول اليله قانينى صوراتينا چكدى. خليفه سببينى سوروشدوقدا بابك جاواب وئردى: "سيز منيم او بيرى اليمى ده كسديره جكسيز. قان گئتمك نتيجه سينده منيم رنگيم آغاراجاق. بو قاباغا گلمه مك اوچون اوزومو قيرميزى ائتديم". خليفه دستور وئردى اونو تئزراق ائعدام ائتسينلر.
بابك ائعدام اولدويسا٬ اونون آدى ميللتلرينى سئوه نلر آراسيندا ايفتيخار ايله "اؤلمز بابك" قالدى و آذربايجان خالقى اونون آدينا ايفتيخار ائدير. آللانميش "افشين" ايسه٬ سونرا خليفه طرفيندن اؤلدورولدو. قوناغينى دوشمنه وئره ن خايين "سومبات" آدى هميشه نيفرت ايله دئييلير.
0 Comments:
Post a Comment
<< Home